There Was A Lass.

A poem by Robert Burns

Tune - "Duncan Davison."


There was a lass, they ca'd her Meg,
And she held o'er the moors to spin;
There was a lad that follow'd her,
They ca'd him Duncan Davison.
The moor was driegh, and Meg was skiegh,
Her favour Duncan could na win;
For wi' the roke she wad him knock.
And ay she shook the temper-pin.


As o'er the moor they lightly foor,
A burn was clear, a glen was green,
Upon the banks they eas'd-their shanks,
And ay she set the wheel between:
But Duncan swore a haly aith,
That Meg should be a bride the morn,
Then Meg took up her spinnin' graith,
And flang them a' out o'er the burn.


We'll big a house, a wee, wee house,
And we will live like king and queen,
Sae blythe and merry we will be
When ye set by the wheel at e'en.
A man may drink and no be drunk;
A man may fight and no be slain;
A man may kiss a bonnie lass,
And ay be welcome back again.

Reader Comments

Tell us what you think of 'There Was A Lass.' by Robert Burns

comments powered by Disqus

Home | Search | About this website | Contact | Privacy Policy