She's Fair And Fause.

A poem by Robert Burns

Tune - "She's fair and fause."


She's fair and fause that causes my smart,
I lo'ed her meikle and lang;
She's broken her vow, she's broken my heart,
And I may e'en gae hang.
A coof cam in wi' routh o' gear,
And I hae tint my dearest dear;
But woman is but warld's gear,
Sae let the bonnie lass gang.


Whae'er ye be that woman love,
To this be never blind,
Nae ferlie 'tis tho' fickle she prove,
A woman has't by kind.
O woman, lovely woman fair!
An angel form's fa'n to thy share,
'Twad been o'er meikle to gien thee mair
I mean an angel mind.

Reader Comments

Tell us what you think of 'She's Fair And Fause.' by Robert Burns

comments powered by Disqus