Hear, Land o' Cakes and brither Scots,
Frae Maidenkirk to Johnny Groat's;
If there's a hole in a' your coats,
I rede you tent it:
A chiel's amang you taking notes,
And, faith, he'll prent it!
If in your bounds ye chance to light
Upon a fine, fat, fodgel wight,
O' stature short, but genius bright,
That's he, mark weel,
And wow! he has an unco slight
O' cauk and keel.
By some auld, houlet-haunted biggin,
Or kirk deserted by its riggin,
It's ten to one ye'll find him snug in
Some eldritch part,
Wi' deils, they say, L--d save's! colleaguin'
At some black art.
Ilk ghaist that haunts auld ha' or chaumer,
Ye gipsey-gang that deal in glamour,
And you deep read in hell's black grammar,
Warlocks and witches;
Ye'll quake at his conjuring hammer,
Ye midnight b----s!
It's tauld he was a sodger bred,
And ane wad rather fa'n than fled;
But now he's quat the spurtle-blade,
And dog-skin wallet,
And ta'en the, Antiquarian trade,
I think they call it.
He has a fouth o' auld nick-nackets:
Rusty airn caps and jinglin' jackets,
Wad haud the Lothians three in tackets,
A towmont guid;
And parritch-pats, and auld saut-backets,
Afore the flood.
Of Eve's first fire he has a cinder;
Auld Tubal-Cain's fire-shool and fender;
That which distinguished the gender
O' Balaam's ass;
A broom-stick o' the witch o' Endor,
Weel shod wi' brass.
Forbye, he'll shape you aff, fu' gleg,
The cut of Adam's philibeg:
The knife that nicket Abel's craig
He'll prove you fully,
It was a faulding jocteleg,
Or lang-kail gully.
But wad ye see him in his glee,
For meikle glee and fun has he,
Then set him down, and twa or three
Guid fellows wi' him;
And port, O port! shine thou a wee,
And then ye'll see him!
Now, by the pow'rs o' verse and prose!
Thou art a dainty chiel, O Grose!
Whae'er o' thee shall ill suppose,
They sair misca' thee;
I'd take the rascal by the nose,
Wad say, Shame fa' thee!