Lady Onlie.

A poem by Robert Burns

Tune - "The Ruffian's Rant."


I.

A' the lads o' Thornie-bank,
When they gae to the shore o' Bucky,
They'll step in an' tak' a pint
Wi' Lady Onlie, honest Lucky!
Lady Onlie, honest Lucky!
Brews good ale at shore o' Bucky;
I wish her sale for her gude ale,
The best on a' the shore o' Bucky.

II.

Her house sae bien, her curch sae clean,
I wat she is a dainty chucky;
And cheerlie blinks the ingle-gleed
Of Lady Onlie, honest Lucky!
Lady Onlie, honest Lucky,
Brews good ale at shore o' Bucky
I wish her sale for her gude ale,
The best on a' the shore o' Bucky.