Galla Water.

A poem by Robert Burns


There's braw, braw lads on Yarrow braes,
That wander thro' the blooming heather;
But Yarrow braes nor Ettrick shaws
Can match the lads o' Galla Water.


But there is ane, a secret ane,
Aboon them a' I lo'e him better;
And I'll be his, and he'll be mine,
The bonnie lad o' Galla Water.


Altho' his daddie was nae laird,
And tho' I hae nae meikle tocher;
Yet rich in kindest, truest love,
We'll tent our flocks by Galla Water.


It ne'er was wealth, it ne'er was wealth,
That coft contentment, peace, or pleasure;
The bands and bliss o' mutual love,
O that's the chiefest warld's treasure!

Reader Comments

Tell us what you think of 'Galla Water.' by Robert Burns

comments powered by Disqus