Amang The Trees.

A poem by Robert Burns

Tune - "The King of France, he rade a race."



I.

Amang the trees, where humming bees
At buds and flowers were hinging, O,
Auld Caledon drew out her drone,
And to her pipe was singing, O;
'Twas pibroch, sang, strathspey, or reels,
She dirl'd them aff fu' clearly, O,
When there cam a yell o' foreign squeels,
That dang her tapsalteerie, O.

II.

Their capon craws and queer ha ha's,
They made our lugs grow eerie, O;
The hungry bike did scrape and pike,
'Till we were wae and weary, O;
But a royal ghaist wha ance was cas'd
A prisoner aughteen year awa,
He fir'd a fiddler in the north
That dang them tapsalteerie, O.

Reader Comments

Tell us what you think of 'Amang The Trees.' by Robert Burns

comments powered by Disqus