Waly, Waly, Love be Bonny

A poem by George Wharton Edwards

O waly, waly up the bank,
And waly, waly down the brae,
And waly, waly yon burn side,
Where I and my love were wont to gae.
I leant my back unto an aik,
I thought it was a trusty tree;
But first it bow'd, and syne it brak,
Sae my true love did lichtly me.

O waly, waly, but gin love be bonny,
A little time while it is new;
But when its auld, it waxeth cauld,
And fades awa' like morning dew.
O wherfore shuld I busk my head?
Or wherfore shuld I kame my hair?
For my true love has me forsook,
And says he'll never loe me mair.

Now Arthur-Seat sall be my bed,
The sheets shall neir be prest by me:
Saint Anton's well sall be my drink,
Since my true love has forsaken me.
Marti'mas wind, when wilt thou blaw,
And shake the green leaves aff the tree?
O gentle death, when wilt thou cum?
For of my life I am wearýe.

'Tis not the frost that freezes fell,
Nor blawing snaws inclemencýe;
'Tis not sic cauld that makes me cry,
But my love's heart grown cauld to me.
Whan we came in by Glasgow town,
We were a comely sight to see;
My love was clad in black velvet,
And I myself in cramasýe.

But had I wist, before I kist,
That love had been sae ill to win,
I had lockt my heart in a case of gowd,
And pinnd it with a siller pin.
And, oh! that my young babe were born,
And set upon the nurse's knee,
And I myself were dead and gane!
And the green grass growing over me.