Tune - "Banks of Banna."
Yestreen I had a pint o' wine,
A place where body saw na';
Yestreen lay on this breast o' mine
The gowden locks of Anna.
The hungry Jew in wilderness
Rejoicing o'er his manna,
Was naething to my hinny bliss
Upon the lips of Anna.
Ye monarchs tak the east and west,
Frae Indus to Savannah!
Gie me within my straining grasp
The melting form of Anna.
There I'll despise imperial charms,
An empress or sultana,
While dying raptures in her arms
I give and take with Anna!
Awa, thou flaunting god o' day!
Awa, thou pale Diana!
Ilk star gae hide thy twinkling ray,
When I'm to meet my Anna.
Come, in thy raven plumage, night!
Sun, moon, and stars withdrawn a';
And bring an angel pen to write
My transports wi' my Anna!
The kirk an' state may join and tell
To do sic things I maunna:
The kirk and state may gang to hell,
And I'll gae to my Anna.
She is the sunshine of my e'e,
To live but her I canna:
Had I on earth but wishes three,
The first should be my Anna.