Our Thrissles Flourished Fresh And Fair.

A poem by Robert Burns

Tune - "Awa Whigs, awa."


Chorus.

Awa Whigs, awa!
Awa Whigs, awa!
Ye're but a pack o' traitor louns,
Ye'll do nae good at a'.

I

Our thrissles flourish'd fresh and fair,
And bonnie bloom'd our roses;
But Whigs came like a frost in June,
And wither'd a' our posies.

II.

Our ancient crown's fa'n in the dust,
Deil blin' them wi' the stoure o't;
And write their names in his black beuk,
Wha gae the Whigs the power o't.

III.

Our sad decay in Church and State
Surpasses my descriving:
The Whigs came o'er us for a curse,
And we hae done wi' thriving.

IV.

Grim vengeance lang ha's taen a nap,
But we may see him wauken;
Gude help the day when royal heads
Are hunted like a maukin.
Awa Whigs, awa!
Awa Whigs, awa!
Ye're but a pack o' traitor louns,
Ye'll do nae gude at a'.

Reader Comments

Tell us what you think of 'Our Thrissles Flourished Fresh And Fair.' by Robert Burns

comments powered by Disqus

Home | Search | About this website | Contact | Privacy Policy