O, For Ane-And-Twenty, Tam!

A poem by Robert Burns

Tune - "The Moudiewort."


Chorus.

An O, for ane-and-twenty, Tam,
An' hey, sweet ane-and-twenty, Tam,
I'll learn my kin a rattlin' sang,
An I saw ane-and-twenty, Tam.

I.

They snool me sair, and haud me down,
And gar me look like bluntie, Tam!
But three short years will soon wheel roun'
And then comes ane-and-twenty, Tam.

II.

A gleib o' lan', a claut o' gear,
Was left me by my auntie, Tam,
At kith or kin I need na spier,
An I saw ane-and-twenty, Tam.

III.

They'll hae me wed a wealthy coof,
Tho' I mysel' hae plenty, Tam;
But hear'st thou, laddie, there's my loof
I'm thine at ane-and-twenty, Tam.
An O, for ane-and-twenty, Tam!
An hey, sweet ane-and-twenty, Tam!
I'll learn my kin a rattlin' song,
An I saw ane-and-twenty, Tam.

Reader Comments

Tell us what you think of 'O, For Ane-And-Twenty, Tam!' by Robert Burns

comments powered by Disqus

Home | Search | About this website | Contact | Privacy Policy