Is There, For Honest Poverty.

A poem by Robert Burns

Tune - "For a' that, and a' that."


I.

Is there, for honest poverty,
That hangs his head, and a' that?
The coward-slave, we pass him by,
We dare be poor for a' that!
For a' that, and a' that,
Our toils obscure, and a' that;
The rank is but the guinea's stamp,
The man's the gowd for a' that!

II.

What tho' on hamely fare we dine,
Wear hoddin gray, and a' that;
Gie fools their silks, and knaves their wine,
A man's a man, for a' that!
For a' that, and a' that,
Their tinsel show, and a' that;
The honest man, though e'er sae poor,
Is king o' men for a' that!

III.

Ye see yon birkie, ca'd - a lord,
Wha struts, and stares, and a' that;
Though hundreds worship at his word,
He's but a coof for a' that:
For a' that, and a' that,
His riband, star, and a' that,
The man of independent mind,
He looks and laughs at a' that.

IV.

A king can make a belted knight,
A marquis, duke, and a' that,
But an honest man's aboon his might,
Guid faith, he maunna fa' that!
For a' that, and a' that,
Their dignities, and a' that,
The pith o' sense, and pride o' worth,
Are higher ranks than a' that.

V.

Then let us pray that come it may -
As come it will for a' that -
That sense and worth, o'er a' the earth,
May bear the gree, and a' that;
For a' that, and a' that,
It's comin' yet for a' that,
That man to man, the warld o'er,
Shall brothers be for a' that!

Reader Comments

Tell us what you think of 'Is There, For Honest Poverty.' by Robert Burns

comments powered by Disqus

Home | Search | About this website | Contact | Privacy Policy