The Howdie.

A poem by David Rorie

'Twas in a wee bit but-an'-ben
She bade when first I kent her,
Doon the side roadie by the kirk
Whaur Andra was precentor.

An' a' the week he keepit thrang
At's wark as village thatcher,
Whiles sairly fashed by women folk,
Wi' "Hurry up an' catch her!"

Nae books e'er ravel't Tibbie's harns,
Nae college lear had reached her,
An' a' she kent aboot her job
Her ain experience teached her.

To this cauld warld in fifty year
She'd fosh near auchteen hunner.
Losh keep's! When a' thing's said an' dune,
The cratur' was a won'er!

A' gate she'd traivelled day an' nicht,
A' kin' o' orra weather
Had seen her trampin' on the road,
Or trailin' through the heather.

But Time had set her pechin' sair,
As on his way he birled;
The body startit failin' fast
An' gettin' auld an' nirled.

An' syne, to weet the bairnie's heid
Owre muckle, whiles, they'd gie her;
But noo she's deid-ay, mony a year-
An' Andra's sleepin' wi' her.

Reader Comments

Tell us what you think of 'The Howdie.' by David Rorie

comments powered by Disqus

Home | Search | About this website | Contact | Privacy Policy